Ynglŷn â’r Adroddiad hwn
O fis Ebrill 2017, cyflwynodd Llywodraeth y DU y gofyniad i bob cwmni sy’n cyflogi mwy na 250 o bobl i adrodd am y bwlch cyflog rhywedd. Mae’r adroddiad hwn a’r ffigurau’n ymwneud â gwybodaeth am gyflogau ar 5 Ebrill 2025.
Mae’n ofynnol i’r gymdeithas adrodd am ddau fesur:
- Canolrif y gyfradd ‘yr awr’, a gyfrifir trwy osod cyflog pob gweithiwr mewn trefn o’r cyflog uchaf i’r cyflog isaf, a chymryd y cyflog ‘yr awr’ ar gyfer y gweithiwr yn y canol.
- Cymedr y gyfradd ‘yr awr’, sef y cyflog ‘yr awr’ cyfartalog ar draws y gymdeithas gyfan.
Mae’n bwysig nodi bod y bwlch cyflog rhywedd yn wahanol i’r egwyddor o gyflog cyfartal. Mae dynion a menywod yn Hedyn yn cael cyflog cyfartal am gyflawni gwaith cyfartal. Mae ein methodoleg ar gyfer cyflogau yn defnyddio proses werthuso swyddi gydnabyddedig a chyfradd a feincnodwyd ar gyfer pob rôl, waeth beth fo’u rhywedd.
Amdanom ni
Ffurfiwyd Tai Hedyn Limited (Hedyn) wrth uno Melin a Newport City Homes ar 1 Ebrill 2025. Fel landlord tai cymdeithasol, rydym yn cefnogi preswylwyr a chymunedau sy’n byw mewn dros 15,000 eiddo ar draws de-ddwyrain Cymru
Credwn mewn creu gweithlu sy’n wirioneddol amrywiol ac yn gytbwys o ran rhywiau er mwyn adlewyrchu’r cwsmeriaid a’r cymunedau rydyn ni’n eu gwasanaethu yn llawn. Bydd hyn yn sicrhau y gallwn ddeall eu hanghenion yn well ac ymateb iddynt yn well, ond hefyd y gallwn wireddu ein gweledigaeth i helpu i adeiladu cymunedau cysylltiedig lle gall pawb fyw’n dda.
Mae amrywiaeth y gweithlu yn caniatáu ffyrdd newydd o weithio o gronfa dalent ehangach, ac mae hyn yn angenrheidiol ac yn beth iawn i ni ei wneud fel cymdeithas dai flaengar sy’n darparu gwasanaethau hanfodol ar draws de-ddwyrain Cymru.
Rydym yn cydnabod ein bod mewn sefyllfa ddylanwadol ac y dylem arwain trwy esiampl i greu diwylliant cynhwysol lle mae cyfraniad pawb yn cael ei werthfawrogi, a lle gallant gyflawni eu potensial llawn.
Ein bwlch cyflog rhywedd
Mae menywod yn ennill £1 am bob £1 y mae dynion yn ei hennill, sy’n golygu bwlch o 0% wrth gymharu canolrif y cyflog ‘yr awr’.
Mae hyn yn cymharu’n gadarnhaol â chanolrif bwlch cyflog y Swyddfa Ystadegau Gwladol (SYG) ar gyfer 2024, sef 13.1% ar gyfer y DU ac 8.9% i Gymru.
Mae’r cymedr cyflog ‘yr awr’ i fenywod 4.04% yn uwch na dynion.
Nid oes unrhyw un yn cael bonws, felly mae gennym fwlch bonws rhywedd o 0% o ran y canolrif a’r cymedr.
Mae 43% o’n gweithlu yn fenywod, a 57% yn ddynion. Mae’r graff canlynol yn crynhoi dosbarthiad dynion a menywod mewn chwartelau cyflog:
Casgliad
Rydym yn arwain gydag ymrwymiad cryf i gydraddoldeb, amrywiaeth a chynhwysiant – gan feithrin diwylliant lle mae pob unigolyn yn teimlo ei fod yn cael ei werthfawrogi, ei barchu a’i rymuso.
Rydym yn sicrhau cyflog teg a chyfartal i bob cydweithiwr ac yn mynd ati’n weithgar i gael gwared ar rwystrau i ddilyniant, gan greu cyfleoedd i bawb ffynnu. Dim ond trwy gyflawni gweithle tecach a mwy cyfartal y byddwn yn cynrychioli’r cwsmeriaid a’r cymunedau rydyn ni’n eu gwasanaethu go iawn ac yn parhau i fod yn gyflogwr y mae pobl yn dewis gweithio gydag ef am flynyddoedd i ddod.
Mae’r canlyniadau hyn yn ein helpu i ddeall y lefelau cydraddoldeb rhywedd ar draws y gymdeithas yn well, ar bwyntiau cyflog gwahanol. Rydym yn defnyddio’r wybodaeth hon i dargedu meysydd i’w gwella ac i adolygu ein cynnig i gydweithwyr wrth i ni ymdrechu i ddod yn weithlu cwbl gynhwysol ac amrywiol.
Rydym yn falch o’n gwaith hyd yma, a byddwn yn parhau i wella hyd nes na fydd unrhyw rwystrau i atal menywod a dynion rhag ymgymryd ag unrhyw rôl swydd.
Datganiad
Mae’r data sydd yn yr adroddiad hwn yn gywir ac wedi’u cyfrifo yn unol â gofynion Rheoliadau Deddf Cydraddoldeb 2010 (Gwybodaeth am y Bwlch Cyflog Rhywedd) 2017.
Paula Kennedy, Prif Swyddog Gweithredol.
