Trawsnewid safle segur yn gartrefi newydd

Mae gwaith wedi dechrau ar drawsnewid hen safle diwydiannol yng Nghasnewydd sydd ddim wedi cael ei ddefnyddio ers amser maith, yn 43 o gartrefi fforddiadwy, gan roi hwb mawr i’r cyflenwad tai yn un o ddinasoedd Cymru sy’n tyfu gyflymaf. 

Bydd datblygiad Ffordd y Ffatri yn Allt-yr-ynn yn golygu bod safle segur yn cael ei ddefnyddio unwaith eto, gan adeiladu cartrefi o ansawdd uchel y mae mawr eu hangen wrth i’r galw barhau i gynyddu ar draws y ddinas. 

Mae poblogaeth Casnewydd wedi tyfu i fwy na 150,000 yn ystod y blynyddoedd diwethaf, ac mae safle’r ddinas rhwng Caerdydd a Bryste wedi tanio’r cynnydd hwn, gyda mwy o bobl yn symud i mewn ac yn rhoi straen ar y farchnad dai. Ar yr un pryd, mae’r ddinas yn mynd yn groes i dueddiadau cenedlaethol, gyda nifer y bobl ifanc 25 i 34 oed yn cynyddu mwy na 27% ers y cyfrifiad diwethaf. 

Mae’r cyfuniad hwn o dwf cyflym a phoblogaeth iau yn gyrru’r galw am gartrefi fforddiadwy, ac mae datblygiadau fel Ffordd y Ffatri yn allweddol i ateb y galw. 

Rydym bellach wedi dechrau gweithio ar y safle, a fydd yn cael ei ailddatblygu’n gymuned newydd o gartrefi ynni-effeithlon, fel rhan o’n rhaglen ehangach i ddatgloi tir segur neu dir sy’n cael ei danddefnyddio ar draws De-ddwyrain Cymru.

Mae’r cynllun wedi sicrhau cyllid Grant Tai Cymdeithasol Llywodraeth Cymru, a bydd yn helpu i fynd i’r afael â’r prinder tai fforddiadwy ac yn cefnogi’r gwaith parhaus o adfywio Casnewydd ar yr un pryd. 

Meddai Peter Crockett, Cyfarwyddwr Gweithredol Twf Grŵp Hedyn:

“Mae cymdeithasau tai yn chwarae rhan hanfodol wrth fynd i’r afael â’r argyfwng tai, ac mae hynny’n dechrau gyda gwaith partneriaeth i ddatgloi safleoedd, gan ddod â manteision go iawn i gymunedau. 

“Ffordd y Ffatri yw’r union fath o gyfle rydyn ni am ei ddatblygu. Trwy weithio’n agos gyda’n cydweithwyr yn yr awdurdod lleol, rydyn ni’n helpu i adfywio tir sydd ddim yn cael ei ddefnyddio’n ddigonol a chefnogi adfywiad ehangach Casnewydd. 

“Gyda’r raddfa a’r arbenigedd i oresgyn rhwystrau, rydyn ni wedi ymrwymo i ddarparu’r cartrefi sydd eu hangen ar gymunedau.

“Mae pob cartref rydyn ni’n ei adeiladu yn cefnogi iechyd gwell, cymunedau cryfach a mwy o gyfleoedd. Dyna pam mae datblygiadau fel Ffordd y Ffatri yn bwysig.”

Mae’r cartrefi newydd yn cael eu datblygu mewn partneriaeth â Grŵp Castell a byddant yn cael eu hadeiladu gan ddefnyddio dulliau adeiladu a safonau amgylcheddol modern, gan helpu trigolion i leihau costau ynni a darparu tai fforddiadwy, diogel yn agos at swyddi, ysgolion, trafnidiaeth gyhoeddus a gwasanaethau lleol ar yr un pryd.

Mae ffyrdd modern o adeiladu yn defnyddio technegau arloesol, gan gynnwys cydrannau a weithgynhyrchir yn fanwl gywir ac a adeiladir oddi ar y safle ac yna’u gosod at ei gilydd ar y safle. Mae’r dull hwn yn lleihau amseroedd adeiladu, yn gwella ansawdd a chysondeb, ac yn lleihau gwastraff a tharfu ar gymunedau lleol. Yn ganlyniad, bydd y datblygiad yn darparu cartrefi o ansawdd uchel sy’n ynni-effeithlon yn gyflymach, gan helpu i gwrdd â’r galw cynyddol yng Nghasnewydd am dai, a chefnogi cynaliadwyedd ar yr un pryd.

Meddai’r Cynghorydd Matthew Evans MBE:

“Mae Casnewydd yn ddinas sydd ar gynnydd, ac mae datblygiadau fel Ffordd y Ffatri yn hanfodol i sicrhau bod pobl leol yn elwa ar y twf hwnnw.

“Mae defnyddio safle sydd wedi’i danddefnyddio ers amser maith unwaith eto mewn ffordd gynhyrchiol fel hyn yr union fath o adfywio rydyn ni am ei weld

Mae’r datblygiad yn rhan o raglen ehangach Hedyn yn dilyn uno Cartrefi Melin a Newport City Homes yn 2025, gan ddod â mwy o gapasiti ac arbenigedd at ei gilydd i ddatgloi safleoedd segur a darparu mwy o gartrefi. 

Ochr yn ochr â darparu tai y mae mawr eu hangen, bydd y cynllun yn cefnogi swyddi lleol yn ystod y gwaith adeiladu a bydd yn trawsnewid safle a danddefnyddiwyd yn flaenorol yn gymdogaeth newydd, ffyniannus. 

Mae’r gwaith adeiladu bellach ar y gweill, ac mae disgwyl i’r cartrefi cyntaf fod yn barod yng Ngwanwyn 2028.