Darganfyddwch beth sy’n achosi lleithder, llwydni ac anwedd a sut y gallwch eu hatal a’u trin.
Mae rhai cartrefi’n dioddef o anwedd a lleithder a all arwain at lwydni. Fel arfer, mae llwydni’n ymddangos mewn mannau lle mae llif yr aer yn wael, ac mewn mannau oer.
Eich diogelwch chi yw ein prif flaenoriaeth ac mae Hedyn wedi ymrwymo i weithio gyda’i holl breswylwyr i sicrhau bod eich cartref yn ddiogel, yn gynnes ac yn gyfforddus ar bob adeg.
Fel arfer, mae lleithder yn cael ei achosi gan anwedd mewn mannau lle nad yw’r aer yn symud llawer a lle nad yw’n gallu sychu. Yn aml, mae hyn oherwydd awyru gwael, neu weithiau gall gael ei achosi gan ddiffygion adeiladu neu bibellau sy’n gollwng.
Mae llwydni yn ymddangos fel smotiau du sy’n gallu clystyru mewn darnau llaith tywyll ar nenfydau, waliau, dodrefn, carpedi neu eiddo. Mae gan sborau llwydni arogl hen sy’n aml yn gysylltiedig â thŷ llaith.
Gall ddod yn broblem ddifrifol os na chaiff ei drin.
Mae yna lawer o resymau pam y gall cartref fod yn llaith, ond yr achos mwyaf cyffredin yw anwedd.
Mae anwedd yn digwydd pan fydd aer cynnes yn oeri a diferion bach o ddŵr yn cwrdd ag arwynebau oer. Gall hyn gynnwys waliau, ffenestri neu deils. Dyma pam mae anwedd yn fwy tebygol o ddigwydd yn ystod y misoedd oerach.
Mae’n normal gweld rhywfaint o anwedd yn eich cartref ar ryw adeg.
Fel arfer byddwch chi’n ei weld ar eich waliau neu ffenestri pan fydd llawer o leithder yn yr aer neu pan fyddwch chi’n creu llawer o stêm.
Gall anwedd arwain at leithder, a gall lleithder achosi llwydni du ar waliau a dodrefn, yn ogystal â llwydni ar ddillad, llenni a ffabrigau. Gall hyd yn oed ddifrodi papur wal a gwaith plastr.
Mae tri phrif beth yn achosi anwedd:
- Gormod o leithder yn eich cartref, sy’n cael ei greu yn aml gan stêm wrth goginio, cael cawod neu gael bath.
- Dim digon o awyru er mwyn i’r aer symud o gwmpas.
- Mae eich cartref yn rhy oer.
Sut i drin llwydni
Os oes llwydni yn eich cartref, dyma ambell air o gyngor i ddelio ag ef a’i atal:
- Peidiwch â’i frwsio na’i hwfro oherwydd bydd hynny’n rhyddhau sborau llwydni i’ch cartref.
- Defnyddiwch sylwedd trin llwydni (ffwngleiddiad) sydd â rhif cymeradwyaeth Awdurdod Gweithredol Iechyd a Diogelwch a dilynwch gyfarwyddiadau’r gwneuthurwr yn fanwl.
- Peidiwch â cheisio ei dynnu heb ddefnyddio cynnyrch trin oherwydd gallai hynny wneud y broblem yn waeth.
- Ar ôl trin y llwydni, addurnwch eto gan ddefnyddio paent neu bast papur wal sy’n gwrthsefyll llwydni, i helpu i atal y llwydni rhag dod yn ôl. Mae’r rhain ar gael o’r rhan fwyaf o siopau DIY.
- Defnyddiwch siampŵ neu olchwch unrhyw garpedi, dillad neu ddodrefn y mae’r llwydni wedi effeithio arnynt.
- Deliwch ag achos y lleithder. Er enghraifft, os mai dŵr yn gollwng sydd wedi achosi’r anwedd neu leithder, sychwch yr ardal yr effeithiwyd arni yn drylwyr.
Sut i osgoi lleithder, llwydni ac anwedd
Mae tri pheth y gallwch chi eu gwneud i leihau anwedd:
Gall rhai gweithgareddau bob-dydd gynhyrchu llawer o leithder yn gyflym yn eich cartref. Trwy wneud y canlynol, gallwch leihau’r lleithder hwn:
- Os oes gennych ffan sy’n echdynnu aer, defnyddiwch hi – mae hyn yn bwysig iawn.
- Sychwch eich ffenestri, siliau ffenestri a waliau yn rheolaidd.
- Agorwch ffenestr neu fent am o leiaf 20 munud ar ôl cael bath neu gawod neu goginio.
- Os allwch chi, sychwch eich dillad yn yr awyr agored.
- Os ydych chi’n sychu eich dillad tu mewn, agorwch ffenestr, os yw’n ymarferol.
- Cadwch gaead ar sosbenni wrth i chi goginio.
- Pan fyddwch chi’n cael bath, rhedwch y dŵr oer yn gyntaf i leihau anwedd sy’n codi. (Rhowch wybod i ni os nad yw’ch ffan echdynnu yn gweithio.)
- Cadwch yr holl fentiau a brics aer ar agor ac yn glir.
- Caewch ddrysau pan fyddwch chi’n coginio, yn golchi dillad, neu’n cael bath neu gawod.
- Agorwch ffenestr am gyfnod byr bob dydd.
- Os ydych chi’n defnyddio sychwr dillad, gwnewch yn siŵr fod fent at wal allanol.
- Gadewch fwlch rhwng eich dodrefn a’ch waliau allanol i helpu aer i gylchredeg.
- Awyrwch gypyrddau, cypyrddau dillad a droriau a pheidiwch â’u gorlenwi.
- Gosodwch eich thermostat ar dymheredd cyson dros 16 gradd ar gyfer pob ystafell. Bydd hyn yn lleihau anwedd sy’n ffurfio ar waliau allanol.
- Ystyriwch aildrefnu eich ystafell. Weithiau gall dodrefn, fel soffas, gymryd yr holl wres o reiddiadur.
- Er mwyn helpu i atal lleithder a llwydni yn eich cartref, ystyriwch ble rydych chi’n rhoi eich dodrefn.
- Ceisiwch osgoi rhoi dodrefn yn erbyn waliau, yn enwedig waliau allanol, oherwydd gall hyn ddal lleithder a chreu’r amgylchedd perffaith i lwydni dyfu. Gadewch fwlch o leiaf 5 i 10cm rhwng dodrefn a waliau er mwyn i’r aer gylchredeg yn rhydd.
- Hefyd, ceisiwch osgoi gosod dodrefn o flaen fentiau, rheiddiaduron neu ffenestri, oherwydd gall hyn rwystro llif aer a chyfrannu at fwy o leithder.
- Cadwch gypyrddau dillad a chypyrddau wedi’u hawyru’n dda, a pheidiwch â’u gorlenwi, oherwydd gall hyn gyfyngu ar gylchrediad aer ac annog lleithder.
Riportiwch bryderon am leithder a llwydni
Er mwyn ein helpu i fynd i’r afael â’ch mater, rhowch gymaint o wybodaeth â phosibl, fel y lleoliad, y math o broblem, a pha mor hir y mae wedi bod yn mynd ymlaen. Os gallwch anfon llun atom, gwnewch hynny os gwelwch yn dda.
Cysylltu â Hedyn hello@hedyn.cymru 0300 1212 345 WhatsApp
Trefnu atgyweiriad
Mae rhai atgyweiriadau yn gyfrifoldeb arnom, a rhai yn gyfrifoldeb arnoch chi, dysgwch sut i drefnu atgyweiriad a beth sy’n digwydd nesaf.
Find out more