Ymestyn eich les

Mae ymestyn les yn ffordd o ychwanegu mwy o flynyddoedd at eich les a gall hynny gynyddu ei gwerth a’i gwneud yn haws i chi werthu a chael ail forgais.

Pan fydd gennych estyniad i’ch les, byddwch yn cael les newydd am dymor eich les bresennol ynghyd â 90 mlynedd ac mae unrhyw rent tir yn cael ei ostwng i sero (a elwir yn ‘rent hedyn pupur’). Os ydych chi’n rhannu perchnogaeth, rhaid i chi dalu rhent o hyd.

Beth yw manteision ymestyn les?

Trwy ychwanegu rhagor o flynyddoedd at eich les, gallwch gynyddu gwerth eich eiddo a’i gwneud hi’n haws gwerthu neu gael ail forgais.

Wrth i’ch les fynd yn fyrrach, gall leihau mewn gwerth ac mae benthycwyr yn llai tebygol o fod eisiau benthyca yn ei herbyn. Mae gan bob benthyciwr eu gofynion eu hunain, ac efallai y bydd rhai eisiau mwy nag 85 mlynedd ar y les, ond efallai y bydd eraill yn hapus gyda llai na hyn. Dylech siarad â’ch benthyciwr neu frocer morgeisi am ragor o wybodaeth.

Pan fydd llai nag 80 mlynedd ar ôl ar eich les, mae’r gost o’i hymestyn yn cynyddu’n sylweddol. Felly, mae’n syniad da dechrau meddwl am ymestyn eich les cyn y pwynt hwnnw.
Mae yna ddau lwybr er mwyn ymestyn les – llwybr ffurfiol a llwybr anffurfiol.

Llwybr ymestyn anffurfiol

Rydyn ni’n hapus i ystyried ceisiadau am estyniad i’ch les ar sail anffurfiol. Dydyn ni ddim yn gallu cytuno bob tro, ond byddwn yn rhoi’r rheswm i chi os na allwn ni gytuno.

Sut i ymgeisio

I ddechrau’r broses, cysylltwch â ni i roi gwybod i ni eich bod am ymestyn eich les gan ddefnyddio’r llwybr anffurfiol. Byddwn yn gwirio ein bod yn gallu cynnig estyniad ac yn cadarnhau hyn gyda chi.

Os allwch chi fwrw ymlaen, bydd angen i chi dalu ffi ein syrfëwr fel y gallwn gael prisiad i sefydlu’r premiwm sy’n daladwy. Allwch chi ddim cael y ffi hon yn ôl os ydych yn penderfynu peidio â bwrw ymlaen.

Pan fydd gennym yr adroddiad prisio, byddwn yn cadarnhau’r premiwm a thelerau’r les newydd. Gallai hyn gynnwys amrywiadau i’ch les a fyddai’n rhesymol yn ein barn ni. Bydd y les newydd am gyfnod eich les bresennol ynghyd â 90 mlynedd arall.

Cytuno ar yr estyniad

Os ydych chi am fwrw ymlaen ar y telerau rydyn ni’n eu cynnig, rhowch wybod i ni a rhowch fanylion eich cyfreithiwr i ni hefyd. Gofynnir i’ch cyfreithiwr am ymrwymiad cyfreithiol i gadarnhau y byddant yn talu ffioedd ein cyfreithiwr ni ar ôl cwblhau’r trafodion. Os penderfynwch beidio â bwrw ymlaen â’r estyniad, bydd angen i chi dalu ffioedd ein cyfreithiwr am y gwaith maen nhw wedi’i wneud hyd at y pwynt hwnnw.

Bydd ein cyfreithiwr yn drafftio’r les newydd ac yn ei hanfon at eich cyfreithiwr i’w gwirio. Pan fyddwn ni wedi cytuno arni, bydd y ddwy ochr yn llofnodi a bydd eich cyfreithiwr yn ei chofrestru gyda’r Gofrestrfa Tir. Ar ôl cwblhau’r les newydd, bydd angen i chi dalu ffioedd ein cyfreithiwr ni, y premiwm ar gyfer estyn y les a hefyd unrhyw rent, taliadau gwasanaeth neu rent tir sy’n weddill.

Anfonwch neges atom trwy e-bost.

Amcangyfrif o’r costau

Mae’r tabl hwn yn ganllaw i rai o’r costau sy’n gysylltiedig ag ymestyn eich les.

Mynnwch eich dyfynbrisiau eich hun i weld faint fydd cost eich ffioedd cyfreithiwr a syrfëwr.